Pala Txapelketa igandean bukatu bazen, ez da kirolik faltako egun hauetan ere, Santio jaietan. Gaur bertan, pilota partiduak jokatuko dituzte, herriko haur eta gaztetxoek, txupinazoaren ondoren.
Baina bereziki, etzi hartuko dute protagonismoa kirolek, Santio egunean.
Arano eta Goizueta, zein baino zein gehiago
Ohiko pilota partidua izaten da Santio jaietakoa, Arano eta Goizuetako pilotarien artekoa. Aurten, Huizi eta Lizeaga izanen dira Aranoren ordezkariak, eta Salaberria eta Apezetxea etorriko dira Goizuetatik. Eguerdiko 12:00etan izanen da.
Lau aizkolarik, apustua
Arratsaldean, berriz, aizkolariak izanen dira protagonista. 17:30etan hasita, apustua jokatuko dute lau aizkolarik: Aizarnako Luis Txapartegi eta Ezkurrako Moises Gogortza ariko dira batetik; eta Aurtizko Ander Erasun eta Joseba Izeta aranoarra, Xauxar baserrikoa, bestetik.