ADIN guztietarako jaiak izatea da Santioen helburua, eta aurten ere herriko txikienentzat ekitaldi ugari antolatu dituzte. Gaur esaterako, 11:30etan eta 17:00etan, jolas parkeak jarriko dituzte herriko bi puntutan. Ikastolako atarian puzgarriak, jumpinga, jokoak eta ur gaineko bolak izango dira; eta Txomiñenea pelotalekuan Wipe out jokoa hamar urtetik gorakoentzat. Hau da: enbor eroak, boom splasha eta bira eroa.
Apar festa izango da biharko ekitaldi nagusietako bat: arratsaldeko 17:00etan izango da, ikastolako atarian. Eta handik gutxira, 18:30etan, sokamuturra txikia antolatu dute Foru Plazan.
Santio, ume eta gaztetxoentzat egun haundia
Santio egunean izango dira haur eta gaztetxoei zuzendutako ekitaldi gehienak. Eguna hasteko, Haurrentzako IX Txirrindularitza proba izango da jokoan Arrobitxulo kalean; goizeko 10:00etan hasiko da eta oraindik izena eman ez duenak 09:30etan izango du aukera. Ordu erdira, 4 eta 11 urte bitarteko haurrentzat joko tradizionalak antolatu dituzte Mundarro plazan: lokotxak biltzea, zaku lasterketa, soka tira... Eta azkenik, 19:30etan, gorputza astintzeko aukera izango dute txikienek, haur berbena antolatu baitute Sagardo plazan: A ze nolako banda parranda izena du ikuskizunak.
Bukatzeko, Santa Ana egunean Circortito taldearen zirko ikuskizuna izango da Apeztegi plazan, 18:00etan: akrobaziak, pailazoak, magia, musika eta umorea uztartzen dituzte, familia guztiaren gozamenerako.