Ez zuen amestutako Gipuzkoako Itzulia izan, Urko Semperenak, baina bere poza ere izan zuen azkenean, taldekako sailkapena irabazi baitzuen, Donosti Berrirekin; taldearen historian aurrenekoz.
Prologoan bertan hasi ziren gauzak oker, erori egin baitzen astigartarra. Baina amore ematetik urrun, ihesaldian sartu zen bigarren etapan, eta 60 kilometroren ondoren, hirugarren izan zen; baita tarteko helmugetan lider jarri ere! Eta sailkapen nagusian, berriz, bederatzigarren.
Hurrengo egunean okertu ziren gauzak berriro: matxura izan zuen abiatu bezala, eta bizikleta txikiago batekin egin behar izan zuen etapa. Beste bi tarteko helmuga hartu zituen, baina beste matxura batekin eta gorputza erabat minduta, bi minutu eta erdira iritsi zen.
Azkeneko egunean, ezinean
Ihesaldian sartzea zuen helburu azkeneko etapan, baina ezin izan zien aurkariei segitu, minduta, eta Luis Mari Garikanok kendu zion maillota. Hala ere, pena bakarrik ez, poza izan zuen itzuliaren bukaerak: taldeka irabazi, eta Azparren taldekidea hirugarren.