«Azaroan aurreikusi genuena gertatu da. Errotonda berriaren obrengatik, Hernaniko norabidean zegoen A1 eta A2 autobusen parada kendu da, traba egiten zuelako, baina ez da ordezkoa jarri», kritikatu du Astigarragako EH Bilduk.
«Guk ohartarazi genuen, beharrezkoa izango zela Ibai-Lur parean beste bat egokitzea. Honek erakusten du, Udal Gobernuaren utzikeria eta axolagabekeria. Urtebetean, EAJk argi utzi du ez duela ez gaitasunik, ez gogorik, Astigarraga ondo kudeatzeko. Autobus lineekin eta mugikortasun politikan egiten dugun balantzea erabat negatiboa da».
«Erabiltzaileko 21,64 euro», sagardo garaiko zerbitzuak
Bestalde, EH Bilduk gaitzetsi du, sagardo garaiko gaueko autobus zerbitzuak suposatu duen gastua: «Behemendiko autobusak 5.000 euro baino gehiago, eta Areizagakoak 10.454,04 euro kostatu zaizkigu astigartarroi. Azken horrek, 483 erabiltzaile izan ditu; hau da, 21,64 euroko luxuzko bidaiak ordaindu ditugu astigartarrok».
Horregatik, bi zerbitzuak birplanteatzea eskatu du, eta ordezko ekimenak bideratuko dituela aurreratu du: «mantentzen badira, erabiltzaile eta onuradunek ordain ditzatela, ez astigartarrok».
«EAJ eta EH Bilduren lehentasunak kontrajarriak dira. Guk medikura, lanera edo ikastera doan A3an esfortzua egitea eskatzen dugu; eta EAJk aisialdia eta parrandarako zerbitzuen alde egiten du».