San Joanak pasata, udako oporrez gozatzen hasiak dira Hernaniko neska-mutilak. Hernaniko Udalak Udaleku Irekiak antolatu ditu aurten ere, eta herriko umetxoentzat plan perfektua izaten da udaraz jolasean eta euskeraz disfrutatzeko.
Atzo izan zuten aurreneko eguna, eta uztailaren 22ra bitartean, egunero elkartuko dira, astelehenetik ostiralera, herrian barrena hainbat plan eta jolas egiteko. Urteroko legez, datozen aste hauetan denetatik egiteko aukera izango dute: altxorraren bila, txotxongiloak, tailerrak, jolasak... Eta baita ere, hain estimatuak dituzten ekitaldiak: San Fermin eguna, igerilekuetara irteera, ur festa...
Kirol udalekuak, astelehenetik aurrera
Gaztetxoentzat ere izango dira udalekuak aurten. Kasu honetan, kirola eta euskara dira ardatza. 120 lagun inguruk eman dute izena, eta talde ezberdinetan banatuta ibiliko dira. Astelehenean izango dute aurreneko eguna eta uztailaren 22ra arte luzatuko dira. Izenak berak dioen moduan, kirol hauetan parte hartzen duten gaztetxoek hainbat kirol praktikatzeko aukera izaten dute: piragua, errugbia, hondartza...