Hurrengo urtera arte agurtu zituzten San Joanak, atzo, hernaniarrek. Baina ez tristura eta ez pena, alaitasun ederrean bukatu zituzten jaiak, azkeneko egunaz gozatzen!
Eta minutu bakoitza aprobetxatzeko, goizean goiz esnatu zituzten txistulariek, diana joaz. Sokamuturra eta Azeri Dantza izan ziren, atzo ere, eguneko aurreneko zitak. Gero, bolatokia jarri zuten Plazan, eta aizkolariak aritu ziren Tilosetan. Arratsaldean, San Joan Konpartsa aritu zen kalez kale, garai bateko jantziekin eta Murua Jauregiaren erreplikarekin. Eta gauean, musikak eta Deabru Beltzen ikuskizunak jarri zuen giroa, gauerdian bandera jaitsi baino lehen.
Burugain nagusi, bolan
Larunbatean jokatu zen Hernaniko Bola Txapelketako azken tiraldia, Floridan, eta Lizeaga izan zen onena, 36 brilarekin. Txapelketa, ordea, Miguel Burugainek irabazi zuen, 102 brilarekin, Antonio Miner (101) eta Miguel Arrozpideren (101) aurretik.