Abenduko hauteskundeen ondoren gobernua osatu ez dela eta, berriro deitu dituzte hauteskundeak, Kongresurako eta Senaturako.
Hernanin, 15.289 herritar daude botoa ematera deituta. Guztira, 22 mahai izango dira, herriko 7 eraikin publikotan jarriko direnak: Biteri, Gabriel Zelaia, Larramendiko Udal gelak, Elizatxo ikastola, Zikuñagako Udal eraikina, Langile ikastola eta Haur Eskola. Ereñotzuarrek Txirrita ikastetxean eman behar dute botoa. Goizeko 09:00etatik iluntzeko 20:00ak arte izango da bozkatzeko aukera.
Zazpi udal eraikinetan jarri dira mahaiak.
11 aukera Kongresurako; 10, Senaturako
Hernaniarrek, Gipuzkoatik joango diren diputatu eta senatariak bozkatuko dituzte, eta abendutik hona, zertxobait aldatu da aukera.
Kongresurako, 11 alderdi politiko dauzkate aukeran: EAJ-PNV, PP, EH Bildu, PSE-EE, PACMA, P-LIB, C’s, RECORTES CERO-GRUPO VERDE, PODEMOS/AHAL DUGU-IU-EQUO koalizioa, PCPE, eta UPyD.
Senaturako, berriz, 10: EAJ-PNV, PODEMOS/AHAL DUGU-IU-EQUO koalizioa, EH Bildu, PSE-EE, PP, C’s, PACMA, RECORTES CERO-GRUPO VERDE, P-LIB eta PCPE.