Gudarien Plazan jarri dute zita dantzari finenek gaur, arratsaldeko 18:00etan hasita, beraien abileziak erakusteko. Udalak eta Kriskitiña taldeak antolatuta, Dantza Suelto Txapelketa egingo dute.
Eguraldi txarra eginez gero, Sandiusterrin egingo dute, Plazan beharrean.
Unai Balerdi hernaniarra, dantzarien artean
Gipuzkoa osoko dantzariak etorriko dira parte hartzera; Karrantza, Azpeitia, Villabona, Lezo, Urnieta, Bergara, Errezil, Ibarra eta Zaldibiatik. Eta hernaniar bat ere izango da tartean, Unai Balerdi hain justu; Villabonako Maider Aguinagarekin dantzatuko du.
Fandango eta arin-arin bana, bikote bakoitzak
Bikote bakoitzak, fandangoa dantzatu beharko du aurrena, Hernaniko Txistulari Bandaren doinuek lagunduta, Patxi Apezetxearen zuzendaritzapean. Eta ondoren, arin-arina ere dantzatuko dute, Beñat Luluaga eta Aitzol Txapartegi trikitilariek lagunduta.
Bikote onenak, tallatutako bi sari eskuratuko ditu, Gotzon Huegun artistak egindakoak.