Jaiak iritsi direnean, Udal Gobernu Taldeak ere luzatu nahi izan die gonbitea herritarrei, festetaz gozatzeko. Baina, aldi berean, arduraz jokatzea eta errespetuz gozatzea eskatu die denei:
«Azkar pasa da. Urtebete joan da. Urte sasoi denak bere gazi-gozoekin, loratuz eta ximelduz, argilunekin, poza eta tristurekin, garaipen eta erorikoekin, lan mundura murgiltzen batzuk, ezberdinen artean berdintasuna aldarrikatuz, benetako bakea amestuz eta landuz, Europar Batasunaren jokabide arduragabearen aurrean errefuxiatuei elkartasuna eta eskua zabalduz... Gai hauekin guztiekin (eta beste askorekin), denon artean ahal dugun Hernani onena ereiten eta egiten.
Eta horretan gabiltzala iritsi zaigu jaietarako tartea, hain gureak diren Sanjoanak, suaren magiarekin, zirrara sortzen diguten doinuekin, kolore eta kultura ezberdinak gozatzeko ekimenekin, kontzertu eta erromeria ezberdinekin, txosnen gunea bere aldarrikapenarekin... ‘Hain gureak’ diren ohiko ekitaldiekin eta berriekin.
Bost egunez, kaleak alaitasunez, umorez eta dibertsioz beteko ditugu, Hernaniko eragileen, Udalaren eta beste askoren laguntzaz hernaniar orok ondo pasatzeko antolatutako festa hauetan. Eta, jai giro horretan murgilduta, ezin dugu ahaztu emakumeak errespetatzea funtsezkoa dela.
Gurekin egon ezin diren haiek (senide, lagun, herritarrak) ere gogoratuko ditugu eta gurekin izango ditugu jauzi, doinu eta irribarre bakoitzean.
Bejondeizuela denoi, eta gozatu errespetuz eta errespetuan gozatu.
Gora San Joanak! Gora Hernani!», aldarrikatu dute.