«Txorizo pintxoa eta salda neretzat!», batek; «nik txokolate beroa eta bizkotxoa nahiago!», besteak. Ba gustu guztietarako izango da aukera, egunero, San Joanetako goizaldeetan. Non? Dobera-Kronikako txosnan, noski! Aurten ere, gosari goxuak, ordu ttikitan!
Parranda luzatzen denean, bertan izango dute aukera paregabea denek, sabela betetzeko. 04:00etatik aurrera, jaki gaziak bezala, gozoak ere izango dira, eta gustu guztietarako edariak aukeran.
Haragi egosia ere izango da aurten!
Urterokoari, gainera, nobedade berezi bat gehituko dio txosnak aurten: haragi egosia berreskuratuko dugu! Aurretik ere eskaini izan du Dobera-Kronikak, eta aurten, goizaldero izango da aukera, ekainaren 24tik 27ra, pintxo goxo horiez gozatzeko, etxeratu aurretik.
Baina ez dute hutsik egingo, noski, betiko pintxoek ere, patata tortilla eta txorizo pintxoek, hain justu. Ezta gozoek ere, bizkotxoak bezala. Eta ausartzen denak, erronka polita izango du San Blas opilekin!
Edariak, berriz, hotzak bezala, beroak ere izango dira, momentuaren arabera, bat edo beste aukeratzeko. Garagardoak, Coca Colak eta urak emango dute frexkotasuna, eta saldak, txokolate beroak eta kafeak, berriz, gorputza goxatuko dute.
Herritarren laguntza, barraren alde batean zein bestean
Egun hauetan txosna jartzeko, Doberak eta Kronikak ezinbestekoa dute herritarren laguntza. Eta babes hori, barraren alde batean bezala, bestean ere behar dute.
Batetik, txosnako txandaren batean lagundu dezakete, eta gosaritarako jakiak ere ekar ditzakete, izan bizkotxo, madalena, opil... Horretarako, Dobera-Kronikarekin jarri zaitezkete harremanetan: 943 33 27 99 telefonoan, dobera@dobera.eus helbide elektronikoan, edo bulegoan bertan (Larramendi kalea 11, behea).
Baina, bestetik, barraren beste aldetik ere laguntzen dute herritarrek. Laugarrenez jarriko dute txosna Doberak eta Kronikak, eta urte guzti hauetan, eskertzekoa izan da herritarren babesa. Horregatik, espero dute aurten ere harreman berezi horri eustea, eta beraiei bezala, ingurukoei ere luzatu diete deia, txosnara gerturatzeko.
Modu berean, eskerrak eman nahi dizkiete, baita ere, herriko komertzioei, txosna hornitzeko behar den janaria eskuratzen laguntzeagatik.