Martxa onean ari da Astigarraga, Herriarteko Txapelketan. Dagoeneko lortu du hanka bat finalean sartzea, eta igande honetan, bete-betean sartzeko behar duen garaipena lortzea izango du helburu.
Izan ere, asteburuan Azkoitiaren kontra jokatu du joaneko partidua, eta 1 eta 2 irabazi du. Sorpresa haundiena kadeteetan izan zen, Olarra eta Urdangarinek ez baitzuten tanto bakar bat ere egitea lortu, Oteiza eta Uranga azkoitiarren kontra.
Baina gainontzean, astigartarrak izan ziren nagusi. Jubeniletan, Oiarbidek eta Expositok 10 eta 22 irabazi zuten Cuevas eta Azkoitiaren kontra, eta seniorretan, 11 eta 22 Loidi eta Santxezek, Andueza eta Juaristiren kontra.
Bueltakoa, etxekoen babespean
Finalera iristeko, bueltako partiduan ere abantaila hori mantentzea izango du helburu Astigarragak. Igandean jokatuko dute, 17:00etan, eta etxekoen babesarekin, lortzea espero dute.