San Joan bezpera izango da biharko eguna, eta urteko gau magikoenetakoa argitzeko suak piztuko dira hainbat txokotan.
Eskolan, azken eguna
Hasteko, Astigarragako Herri Eskolan egingo dute festa, azken eskola egunarekin bat. Goizeko 10:00etatik aurrera, adin guztietako ikasleek izango dute zeregina: txalaparta jo, dantza egin, irrintziak bota... Ikuskizunen ondoren, sua piztu, eta bertara botako dituzte urtean zehar gustokoak izan ez dituzten ekintzak.
Ondoren, dantza egingo dute denek suaren inguruan, eta segidan, entzierrotxoak egingo dituzte. Hamaiketakoarekin bukatuko dute, eta agur esango diote elkarri, udako oporrak bukatu arte.
Zortzikoa, sua eta zezensuzkoa
Arratsaldean, berriz, herri osoan nagusituko da festa giroa. Hasteko, San Joan Zortzikoarekin kalez kale ibiliko dira Txirriskla taldeko txistulariak, 19:30etan hasita; 22:30etan, Astigarreko dantzariek San Joan Zortzikoa dantzatuko dute Foru Plazan, eta sua piztuko da segidan. Bukatzeko, 22:45etan zezensuzkoa aterako da astigartarrak dantzan jartzera.