Urtebete pasa da EAJk Astigarragako Udaleko aginte makila hartu zuenetik, eta EH Bilduk urte horren balorazioa egin zuen atzo, prentsaurrean: «legealdiko aurreneko urtea alferrik galdutako urtea izan da. Gaitasunik eta gogorik gabeko Udal Gobernuak Astigarragaren erritmoa guztiz geldiarazi du. Proiektu berririk gabe, aurreko legealdiko lanei esker bizi dira. Inprobisazioa eta gaizki eginak dira nagusi».
«Utzikeria, axolagabekeria...»
Andoni Gartziak, EH Bilduko bozeramaileak hasieran izan ziren aldaketak ekarri zituen gogora: «2015eko ekainaren 13an gobernu aldaketa izan zen Astigarragan: 2garren indarra izan zen EAJk hartu zuen aginte makila, PSE-EEren ezinbesteko babesari esker. Ordutik utzikeria, axolagabekeria eta arduragabekeria bilakatu dira Udal Gobernuaren oinarri nagusiak. Legealdiko lehen erabakietakoa izan zen aurreneko aurrekaria: Alkatearen dedikazioa %47ra mugatu zen eta soldata proportzionalki igo zuen %59,6».
«Kudeaketa, hala nolakoa»
EH Bilduk azpimarratu nahi izan zuen kiroldegia haunditzearen proiektua, eskolaren haunditzea, Tranbia Ibilbidearen hiritartzea eta biribilgune berria, Zarkumendegira bidegorria, Kultur Etxe berria epeetan egiteko konpromisoa... guzti horiek aurreko legealdian EH Bilduren ekimenarengatik lortutakoa dira. Orain EAJk hala nola kudeatzen ditu: bidegorriaren lanak esaterako, geldirik daude».
«EAJk ez du hitza beteko eta hondakin sistemaren bilketa irailera atzeratuko da»
EH Bilduren esanetan, Udal gobernuaren lan bakarra izan da hondakin bilketa sistemaren inguruko galdeketa: «EH Bilduren ekimenari esker herritar guztien artean diseinatzea lortu zen, eta herritarrei esker lortu zen EAJk nahi zuen 5garren edukiontzi boluntario sistema eraginkor bezala baztertzea». Sistema berria martxan jartzeko epeen inguruan ere hitz egin zuen Gartziak: «azken Plenoan ohartarazi genien bezala, inprobisatzen ibiltzeagatik, ez dute hitza beteko, eta uztailean izan beharrean, irailera atzeratuko da sistema berriaren ezarpena».
«Hainbat ekimenek porrot egin dute»
EH Bilduk azaldu zuenez, EAJk aurrera eraman dituen hainbat ekimenek «porrot» egin dute: «Azoka inposatu zuten, nahiz eta herriko komertzio txiki gehienak aurka egon. Bertan behera geratu da orain, ia komertzio guztiak aurka daudela ohartu direnean. EH Bilduren ekimenez herriko komertzioa indartzeko plan bat idatzi eta aholkularitza kontratatu zen, baina ez da neurri bat bera ere martxan jarri. Herriko komertzioarentzat ere, galdutako urtea izan da».
A3 linearen inguruan ere aritu zen Gartzia: «A3 autobus linea kendu digute eta Udal Gobernuaren jarrera lotsagarria izan da. Herritarron interesen defendatzaile izan beharrean, Aldundiaren bozeramaile bilakatu dira. Garraio publikoak atzera egin du urte honetan».
DBHren kasuan pausu bat bera ere eman ez dela azaldu zuen Gartziak: «estrategikoa dela aitortu badute ere, orain urtebete utzi genuen bezala dago. DBH kokatuko den lurra zehaztua dago, baina ez da pausorik eman. DBHrentzat ere, galdutako urtea da».
Partehartze arautegiari buruz ere hitz egin zuen EH Bilduk atzo: «urraketen zerrenda geroz eta luzeagoa da. Erantzun gabeko galdera eta proposamenak pilatuz dijoaz eta Pleno eta Batzordeak lotsatzekoak dira».
Etxe hutsen kasuan, alokairu programan sartzeko ekimenik ez dela egin azpimarratu zuten: «diru kopuru galanta alferrik galdu da».
Azkenik, errefuxiatuen kasua ere aipatu zuen Gartziak: «errefuxiatuak bai, baina udal baliabideak eskaintzeko garaian, EAJk ezetz esan du Europar politiko lotsagarriarekin lerrokatuz».
«Gure jarrera da: proposamenak egin eta eraiki»
Bukatzeko, EH Bilduk erronka haundia duela jakinarazi zuen: «utzikeria honen aurrean, Astigarraga utzi genuena baino okerrago ez egotea dugu helburu. Urte honetan, EH Bilduk herritarrekin prestatu ditu aurrekontuak, eta EAJK ahaztutako eremu eta ildoak txertatu dira horri esker. Emakumeen bisibilizazioa sustatzeko hainbat proposamen egin ditugu. Herri bideetarako, 4 urtean 150.000 euro inbertitzea eskatu dugu, eta baita brigadentzako lokal berria ere. Udalak epe motzean eskuratuko duen 800 metroko lokalera haurreskola lekualdatzea eskatu dugu. Oraingoz ezezkoa jaso dugu, baina ez dugu etsiko. Udal Gobernu honen dinamikarekin ez zaigu lanik faltako, baina lanean jarraituko dugu. Azkenik PSE-EEri gogorazi nahi diogu hau aldatzeko ardura guztia berea dela, eta gu prest gaudela lanean jarraitzeko.»