Herritarrak entzun eta bere asmoak mahai gainean jarri zituen EH Bilduk asteazkenean, Atsegindegin, hauteskundeei begira. Ekitaldia izan zuten, eta bertan egon ziren Jone Etxeberria, Kongresurako hautagaia Gipuzkoatik, eta Julen Arzuaga legebiltzarkidea.
Etxeberriak hartu zuen hitza aurrena, eta azaldu zuen, zertara doan EH Bildu Madrilera: «Rajoy botatzera goaz. Barcina bota genuen Iruñatik, eta ez genuen eserlekurik eskatu. Madrilen ere, guk bota dezakegu Rajoy».
«Soldata minimoa 1.200 euro izatea eskatzen dugu»
Etxeberriak nabarmendu zuen, krisiaren eragina enpresetan nabaritu dutela: «Madrilek ez du kontutan hartzen gure hizkuntza, kultura eta egitura ekonomikoa, bestelakoa dena, industriak pisu haundia duelarik. Guk berriz, enpresei laguntzeko poltsa bat sortu genuen, eta soldata minimoak 1.200 eurokoak izan daitezela eskatzen dugu. Podemosek 900ekoak eskatzen ditu; hori da ez dutelako ezagutzen hemengo errealitatea».
Arzuagak aldarrikatu zuen, prest daudela Madrilera joateko, «hemen gertatzen dena salatzera, nahiz eta han egon gure zapalkuntzaren oinarria. Nazio Batuen Erakundean ere izan ginen, eta Madrilera ere joango gara salatzera».