Herriarteko finala geroz eta gertuago du Astigarragak. Bide horretan ordea, azken arerioa gainditu behar du: Azkoitia. Ostiralean jokatuko dute joaneko partidua, Azkoitian, gaueko 22:00etan hasita.
Astigarragak duena emanez gero, badu Azkoitia kanporatzeko aukera. Joaneko partidutik emaitza on batekin itzultzea izango da hiru bikoteen helburua. Hauek dira finalerdia jokatuko dutenak: Olarra-Urdangarin, Oiarbide-Exposito eta Loidi-Santxez.
Pasea, Oñatiren kontra
Finalerdietarako pasea Oñatiren kontra lortu du Astigarragak. Larunbatean jokatu ziren bueltako hiru partiduak, eta hiruetan nagusitu ziren: 18-22, 8-22 eta 9-22.
Gurutzealdek, ezin
Oier Gurutzaldeak ere partidu garrantzitsua zuen asteburuan: Euskal Herriko txapela izan zuen jokoan, trinketean, Inhar Ugarte sopelarraren kontra: 40-22 galdu zuen. Aurkariaren lana azpimarratu nahi izan du astigartarrak: «meritoa berea izan zen, hasieratik fuerte eta ondo aritu zen. Ez zidan ezertarako aukerarik utzi».