Sasoiko dago Ttapa Ttapa egitasmoa, bertan parte hartzen dutenak bezalaxe. Gero eta jende gehiago gerturatzen da asteazken goizetan Atsegindegira, taldean bueltaxka egitera. Ehun lagun inguru ere elkartu dira aurreko asteetako zitetan, eta beraz, indartsu bukatuko dute ikasturtea. Izan ere, azkeneko irteera izango dute bihar, udaran geldialdia egiteko.
Guztira, 184 lagunek hartu dute parte ikasturte honetan; 123 emakume eta 61 gizon. Eta batazbeste, 82 partaide izan dira saio bakoitzean.
Asteazkenero bezala, goizeko 10:30etan jarri dute zita Atsegindegin, egunerako prestatutako paseotxoa egiteko.
Irailaren 28an, datorren ikasturteari hasiera
Egitasmoaren arrakasta ikusita, noski, ez dute hutsik egingo datorren ikasturtean ere, eta dagoeneko, jarri dute bueltatzeko eguna: irailaren 28an izango da, ikasturteko aurreneko irteera.
Antolatzaileen helburua da, gero eta herritar gehiagorengana iristea, eta horregatik, guztiei luzatu diete gonbitea, animatzeko.