Azken metroetan egin zion ihes garaipenak, Urko Semperenari

Oso gertu bai, baina garaipenik gabe geratu zen Urko Sempere­na, aurreko igandean, Anoeta­ko proban. Azkenean, bigarren postuaren konformatu behar izan zuen, Iñigo Altuna lasartearraren atzetik.
Lasterketaren hasieran egin zuen ihes astigartarrak, Luis Mari Garikano eta Manex Ira­zustarekin, eta 12 txirrindulariko talde bat batu zitzaien gero. Hortik aurrera, bai Orendain eta bai Altzo igotzen, erritmoa bizitu zuen Semperenak, eta baita taldea txikitu ere, baina azkeneko jaitsieran, Altunak eta Garikanok egin zuten ihes.
Hala ere, astigartarraren eta Azparren taldekidearen la­nak, gertu mantenduko zuen taldetxoa, eta azken kilometroan harrapatu zituzten biak. Orduan, esprinta jo zuen Sem­perenak, baita buruan jarri ere, baina azken metroetan hartu zion aurrea Altunak.

Arantzazuko Igoeran, lanean
Aurreko egunean ere izan zuen lasterketa Urko Semperenak, Oñatitik Arantzazura Igoeran. Proba berezia da, bederatzi kilometrokoa, dena gorantza. Eta lanerako zegoen astigartarra: aurreneko bi kilometroetan sua piztu, eta 15 laguneko taldetxoa utzi zuen, Jokin Sara­sola taldekidearen mesedetan. Azkenean, seigarren izan zen Sarasola, eta 18garren sartu zen Semperena helmugan.

Romero bosgarren, Lasarten
Tasio Semperena alebinak eta Jaime Romero infantilak, be­rriz, Lasarten izan zuten zita, la­run­batean. Zirkuitu teknikoenetakoa da, igoera eta jaitsiera batekin, eta kurba itxi batean bukatuta. Ez zuen bere onena eman Semperenak, 18garren; baina aurrean ibili zen Rome­ro, eta bosgarren sailkatu zen.

Lan zaila Euskadikoan, Oterminek eta Semperenak
Egun zaila izan zuten To­mas Oter­min eta Telmo Sem­pe­renak Gasteizen, Euskadiko Txapel­ketan. Erritmo bizian hasi zen proba, eta Sali­nas de Añanako igoeran, erretiratu behar izan zuen Otermi­nek. Semperena, berriz, atzean geratu zen, baina bukatzea lortu zuen, 46garren.

Gipuzkoako Txapelketa, kadete eta jubenilek
Asteburu honetan, zita garran­tzitsuak dauzkate. Jubenilek, Gipuzkoako Txapelketa izango dute gaur, 10:00etan Urretxun; eta kadeteek, bi egunetan: erlojupekoa gaur arratsaldean Ber­ga­ran, eta iraupen proba bihar Oñatin. Alebin eta infantilak, Zumaian ariko dira gaur, arra­tsaldeko 16:30etan hasita.