BTT Zeharkaldiaren zazpigarren edizioa antolatu zuen aurreko igandean, Goizuetako Iskibi Kanpinak, eta «arrakastatsua» izan zela diote antolatzaileek.
215 partehartzaile izan zituen aurtengo edizioak, «orain arteko partaidetza haundiena». Horien artean, jatorri desberdinetako jendea zegoen: Oarsoaldea, Buruntzaldea eta Donostiatik hurbildu ziren bertara; baina baita Bizkaia eta Nafarroako txirrindulariak ere.
Aurreneko goizuetarrak
Luzera desberdineko bi ibilbide antolatu zituzten: motza, 30 kilometrokoa, eta luzea, 43koa.
Helmugara iristen lehena, lauko talde bat izan zen, eta horien artean zeuden Axier Otaño urnietarra eta Arkaitz Iza oiartzuarra.
Goizuetarren artean, Oihan Zugarramurdi izan zen lehena ibilbide motzean, eta Martin Etxeberria luzean.
Eskerrak, Goizuetari
«Dena primeran» atera zela jakinarazi dute. Horregatik, antolatzaileek eskertu nahi diote «etorritako jende guztia, baina bereziki Goizuetako herriari; igandean berriz ere erakutsi baitzuten zer den bolondres gisa lana egitea; Goizuetako jendea gabe ezin izango genukeelako gure zeharkaldia aurrera atera».