Iazko proposamenak baino bost bat aldiz gehiago egin dituzte aurten herritarrek Hernani Erabaki parte-hartze prozesuaren barruan; guztira, 666. Horietatik, gehienak (197) mugikortasunarekin lotuak, eta espazio publiko, parke eta plazekin (97); ingurumenarekin (65); kirolarekin (63); hondakinekin (54); eta herri lan eta garbiketekin (49).
Orain, bigarren fasea hasi da; irailaren 11ra arte, udal teknikari eta ordezkari politikoek guztiak aztertuko dituzte. Orduan azalduko dute zergatik baztertu dituzten batzuk, eta zein den onartu direnen aurrekontua eta beharrak, ondoren, batzuk lehenetsi, eta azkenik, bozketa egiteko.
Proposamen nabarmenenak
Egindako proposamenen artean, kopuruagatik nabarmendu egin dira batzuk.
Esaterako, hondakinei dagokienez, txakur kakak kontrolatzeko hainbat neurri proposatu dira. Herri lanei dagokienez, berriz, hainbat kaletako garbiketa hobetzea. Ingurumenarekin lotuta, besteak beste, soinu kutsaduraren aurkako neurriak, berdegune gehiago jartzea edo Urumearako plana. Mugikortasuna eta espazio publikoarekin lotuta, berriz, trafiko erregulazioak, errepide konponketak, parke eta plazak estaltzea...
Proposamen gehiago ere egin dira. Dokumentazioa ikusteko: beheko loturan.
Informazio osoa, webgunean
Proposamenak egiteko hainbat bide izan dira, baina bat, berria: auzoz auzokako bilerak. Gutira, zortzi egin dira; aktak erabaki.hernani.eus webgunean jaso dituzte. Pixkanaka, proposamen guztien zerrenda ere, jarriko da.