Hainbat proposamen egin zituzten asteazkenean Hernaniko ikastetxeetako ikasleek Pleno aretoan, Alkatearen eta zinegotzien aurrean, energia jasangarria bultzatzeko.
Ikasturte osoan zehar, Eskolako Agenda 21 programaren barruan, energia jasangarriaren inguruan lanean aritu dira Elizatxo, Urumea, Inmakulada eta Langile ikastetxeetako Lehen eta Bigarren Hezkuntzako eta Batxilergoko ikasleak. Atera dituzten ondorioen berri eman zuten herenegun.
Eskola eta herria aztertzen
Ikasleek azaldutakoaren arabera, energia jasangarriaren inguruan ikasten eta lanean pasa dute ikasturtea: «gure etxeetan zein energia mota ezberdin erabiltzen ditugun ohartu gara, gure auzoan argiak duen garrantziaz ere bai, kaleko argiteria aztertu dugu, herritarrei ere galdeketa ezberdinak egin dizkiegu...». Horrela, Hernaniko mapa energetikoa aztertu dutela azaldu zuten.
Aztertutako guztia biltzeko, berriz, eskola bakoitzeko ordezkariak Biterin bildu ziren maiatzean, eta hainbat ondorio atera zituzten; baita konpromisoak hartu ere.
Konpromisoak eta eskaerak, aurrezteko
Konpromisoen artean, ikasleek azaldu zuten garraio publikoa erabiliko dutela, gelatik ateratzean argia itzaliko dutela, etxe-tresna elektrikoak itzali egingo dituztela stand-by egoeran utzi beharrean... Dagoeneko konposta egiten dutela ere azaldu zuten.
Eta era berean, hainbat eskaera egin zizkieten udal ordezkariei: herriko farolen azterketa eta egokitzapena, eguzki panel edo energia eolikoaren alde egitea, kontzientziazio kanpainak egitea...
Ideia guztiengatik eskerrak eman, eta kontuan izango dituztela ziurtatu zien Alkateak.