Gipuzkoako Foru Aldundiaren Sagardo Txapelketa izango da gaur jokoan. 15garren edizioa da aurtengoa, eta finala eguerdiko 12:00etan jokatuko da, Donostiako Gastronomiazko Euskal Anaiartean. Aurten Gipuzkoako 18 herrietako 39 sagardotegiek hartu dute parte, eta inoizko partehartzerik haundiena izan da. Diputazioak bi helburu nagusi ditu: ekoizpen prozesuan sagardogileek egin duten lanaren balioa nabarmentzea; eta botilaratutako sagardoaren kalitatea saritzea, bai ikuspegi organoleptikotik; eta baita analitikotik ere.
15 parametro neurtu dira
Diputazioak jakinarazi duenez, partehartzaileen sagardotegietako kupeletatik hartu dira laginak, eta Fraisoroko laborategian aztertu dira: «aurtengo sagardoetan 15 parametro neurtu dira, baina analitika fasean lau hartu dira kontuan: azidotasun lurrukorra, azukrerik gabeko guztirako estraktu lehorra, metanola eta glukosa-fruktosa. Sagardotegi bakoitzak aukeratzen du zein kupeletatik hartuko den sagardoa, eta hamahiruna botila hartzen dira». Azaldu dutenez, sailkapenerako probaketak maiatzean egin ziren Fraisoron, eta sei onenak pasa dira gaurko finalera; horien artean bi dira hernanirrak: Altzueta eta Akarregi,. Besteak: Aburuza, Alorrenea, Gaztañaga eta Izeta. Hernanikoa ote da aurtengo sagardorik onena?
Altzueta: «Aurten txapela janzteko esperantza dugu»
Altzueta sagardotegia bederatzigarrenez izango da gaur, finalean; azken hiruetan gainera, azpitxapeldun izana da. Kronikara bidalitako oharrean aitortu dute aurten txapela janzteko esperantzarekin direla. Azaldu dute, urteetan desiratutako txapela eskuratzeko aukera izango dela aurtengoa. Finalera beste inor baino gehiagotan iritsi den sagardotegia da Altzueta: 15 txapelketa jokatu dira eta 9 finaletan izan dira hernaniarrak. Ibilbide horretan bost aldiz lortu dute bigarren saria, eta behin hirugarrena.