Bolada onarekin dabiltza Semperenatarrak, eta aurreko asteburuko txapelketak horren lekuko izan ziren, beste behin.
Urrea eta brontzea, Zumaian
Aurreko igandean jokatu zuten Zumaian Gipuzkoako Txapelketaren taldekako erlojupekoa, eta junior mailan, Urko Semperenaren taldea, Victor Alvaro Construcciones-Silam, izan zen garaile, 39:58 minutuko denborarekin. Bigarren geratu zen Limousin taldea, lau segundura.
Bestalde, kadeteetan, Telmo Semperena eta bere taldekideak ere podiuma lortu zuten. Hirugarren postuan geratu ziren, 26:34ko denborarekin. Eroski izan zen aurreneko taldea, 26:17 minuturekin, eta Inoxcra bigarren geratu zen irabazletik 7 segundutara.
Beste bi proba, larunbatean
Horrez gain, beste bi proba ere izan zituzten Astigarragako txirrindulariek larunbatean. Pasaiako BTT lasterketan izan ziren Tasio Semperena eta Aketza Bolado, eta hamabosgarren eta hamazazpigarren iritsi ziren, hurrenez hurren.
Bestalde, VI Ataun Sarian izan ziren Telmo Semperena eta Tomas Otermin kadeteak. Bien artean lan ona egin zuten, eta beraien lanari esker lortu zuen Aitor Larrañaga taldekideak seigarren postua.
Bina proba, gaur eta bihar
Asteburu honetan ere proba desberdinetan arituko dira txirrindulariak. Gaur, arratsaldeko 16:30etan, Lasarteko lasterketan arituko dira alebin eta infantilak, eta ordu berean, Arantzazuko Igoera jokatuko dute jubenilek.
Bihar, aldiz, M. Oiarzabal-A. Urkola memoriala jokatuko dute jubenilek; eta Ander Ruiz de Larrea Euskaldiko Txapelketan izango dira kadete mailako txirrindulariak. Bi proba hauek goizeko 10:00etan hasiko dira, bata Anoetan eta Gasteizen, bestea.