Dantzarako eta ondo pasatzeko errepertorioa izaten da Laiotz erromeria taldearena; egunez nahiz gauez gozatzeko aproposa. Baina kaleratu berri duten diskoari, Gaua deitu diote. Dagoeneko salgai dago Elkar dendetan; Hernaniko Garin, Kixkal eta Rioja tabernetan; Ereñotzuko Irrintzin; Ergobiara bidean dagoen Iretzan; Astigarragako Zipotzan eta Goizuetan.
Osiñagako festetan, 25 urte
Xabier Barrenetxea, bateria-joleak azaldutakoaren arabera, 25 urte betetzen ditu aurten Laiotzek. «Lehenxeago bodatan eta, jotzen genuen, baina aurreneko erromeria Osiñagako festetakoa izan zen, orain 25 urte!». Eta gaur ere, ez dute hutsik egingo.
Hurrengo asteburuetan ere, etenik gabe ariko dira: Ereñotzuko festetan, Martindegin eta Gipuzkoa, Bizkaia eta Nafarroako beste hainbat herritan. Hala ere, plazarik gustokoenak etxekoak izaten dituzte. «Aurten ez zaigu tokatzen, baina... Hernaniko San Joan bezperako plaza bezelakorik ez dago! Portu auzoko festetakoa ere ederra da, edo Donostiako Kaikoa... Etxekoak dira onenak; 4 katu izaten gara agian, baina oso ondo pasatzen dugu!».
Urumea errekan barrena, itsaso zabalera
Oialumen sortutako taldea da, baina Urumea errekari segika bezala, itsasoa bera baino zabalagoa bihurtu da. Barrenetxea, hernaniarra izatez, Astigarragan bizi da orain; Naroa Jaka abeslaria hernaniarra da; Ibai Soroa baju-jolea, Arribekoa (Nafarroa); Dani Narbarte trikitilaria, goizuetarra; eta David Soriazu gitarra-jolea, hernaniarra.
Horrela, Urumea bailara osoan, eta Euskal Herri osoan ere, plazaz plaza ibili eta tokian tokira egokitzen ohitu dira. Diskoa ere horrela osatu dute. «Kantu kañeroak, fandangoak, polkak, baltsak, rantxerak... Denetik jotzen dugu plazan; plaza bakoitzera egokitu egiten gara, eta hori bildu dugu diskoan. Gu plazak betetzen gaitu. Jendea badago, eta dantzan aritzen bada, guk ere ondo pasatzen dugu».
Udari aurre egiteko prest
Disko berria besapean, udako denboraldirako prest dago taldea, eta seguru, plazaz plaza, kanturen bat edo beste oso ezagun bihurtuko dela. «Diskoko 10garren kanta bultzatu nahi dugu, eta EskolHarria, dagoeneko ezagun egin baita. Koreografia ere egin diote!». Hain zuzen, Sortzen elkartearentzako egin dute kantua, Solanoren laguntzarekin, Urumea bailarako eskolen bueltan (bideoklipa, beherago). «Guk hori daukagu buruan, baina auskalo».