Mikel Goenaga, Astigarragako apaiza zena, hil zen duela bi hilabete pasatxo. Astigarragara iritsi zenetik, herriarekin, eta herritarrekin batez ere, lotura berezia izan zuen apaiza izan zen Goenaga. Eta hori eskertzeko, egindako lan guztia goraipatzeko, omenaldi berezia antolatu du Sorabilla elkarteak biharko.
Elizatik, Murgia jauregira
Omenaldiari hasiera emateko, meza berezia egingo dute goizeko 10:30etan. Eta hori bukatuta, Goenagarentzat bereziki prestatutako bideoa emango dute elizan bertan. Sorabilla elkarteak apaizaren eguneroko bizitzari buruzko argazkiak, bideoak... bildu ondoren.
Ondoren, bazkaltzera joango dira Murgiako jardinetara. Herritarrek jakiak eraman ditzaten eskatu dute; ondoren, denen artean elkarbanatzeko.
Herriko taldeak, bertan
Sorabilla elkarteak antolatu du omenaldia, eta bereziki Jose Mari Orbe markesa izan da eragile nagusia. Baina herriko talde askok hartuko dute parte: Aiztondo, Astigar, Harituz, Musika Eskola, SOS Arrazakeria, txistulariak, txalapartariak, Akelarreko taldea, eskolako haurrak...