Hamar urte betetzen ditu Umore Ona abesbatzak, eta urteurren festa eginen dute bihar.
Batetik, kontzertu berezia emanen dute, hainbat gonbidaturekin. Bestetik, bazkaria eginen dute segidan, eta iluntze aldera bideo proiekzioa jarriko dute.
Abeslari eta zuzendari ohiak, denak bat
Elizan emanen du kontzertua bihar Umore Onak, eguerdiko 12:30etan hasita, eta gonbidatu bereziak izanen dira bertan.
Batetik, 10 urte hauetan zehar korukide izandako guztiak gonbidatu dituzte. «Arrazoi desberdinengatik korua utzi zutenei gonbitea luzatu diegu egun honetan elkarrekin abesteko, beraiek alde garrantzitsua izan direlako».
Bestetik, hiru zuzendari izanen dituzte lagun: Imanol Kamio, Eneko Amundarain eta Igaratza Apezetxea.
Kantu poteoa, bazkaria eta bideoa, segidan
Kontzertua bukatuta, segi eginen dute festarekin. Salda banatuko dute entzuleen artean, eta kantu poteoan ariko dira herrian barrena, 15:00ak arte. Ondoren, bazkaria izanen da; eguraldi ona bada, kanpoan.
Bazkalondorenean, eskolako jangelan jarriko dute umorea: koruaren azken 10 urteetako pasadizoak biltzen dituen bideoa jarriko dute.