Astigarragako Udala Santiagomendi-Landarbaso inguruaren Paisaiaren Ekintza Plana osatzen ari da. Eragileekin batera osatutako aurreneko fasea bukatu berri dute; eta orain hasiko den bigarren fase honetan, «astigartarron txanda» dela adierazi du Udalak.
Galdetegia etxeetara eta webgunean
Udalak dioenez, bigarren fase honetan, «bertako biztanleen parte-hartzea ezinbestekotzat jotzen da, astigartarren itxaropenei eta nahiei egokitzen zaien plan on bat egiteko». Horretarako, inkesta bat bidaliko du Udalak etxeetara, eta araudi.wix.com/pap-astigarraga web orrian ere egin ahal izango da. Paperean betetzen dutenek, udaletxean edo Kultur Etxean utzi ahal izango dute galdetegia.
«Udal gobernuaren apostua»
Hilabete hauetan martxan dagoen Santiagomendi-Landarbasoko Paisaiarako Ekintza Plana «udal gobernuaren apustua» izan dela jakinarazi dute. Diotenez, «ekintzaren helburuak Santiagomendi-Landarbaso eremua antolatzea, babestea eta berriztatzea dira».
Gainera, Udaletik diote badakitela «astigartarrek asko estimatzen duten ingurua dela», izan ere, «landa inguruko biztanleriaren kultura eta tradizioa irudikatzen» ditu. Horregatik, «udal taldeak ezinbestekotzat jotzen du paisaiarako ekintza planaren bidez eremua balioan jartzea».