Osasunaren alde eta erraustegiaren kontra giza katea egin zuten igandean milaka lagunek, Donostiako Onkologikotik Gipuzkoa Plaza. Ehundaka hernaniarrek ere hartu zuten parte aldarrikapenean; Astoria kafetegitik Easo Plazara dijoan tartean egon ziren herritarrak. Onkologikoa eta Diputazioa giza-hari batekin lotzeko 5.000 lagun beharko zirela aurreikusi zuten antolatzaileek, eta azaldu zutenez, aurreikuspenak modu oso nabarmenean gainditu ziren.
Ekitaldi bukaeran, hiru lagunek irakurri zuten: Xabier Mitxelena medikuak; Clara Lopez madrildarrak, Valdemingomezko erraustegitik bost kilometrora bizi denak eta beste 36 bizilagun minbizidunekin batera kereila jarri duenak; eta Teresa Lopez de Munainek, Erraustegiaren kontrako Mugimenduaren izenean.
«Gu medikuak garen heinean, mezu bat azpimarratu nahi dugu: «erraustegiak kaltegarriak dira osasunerako»
Xabier Mitxelena medikuak irakurritako mezua
Ekitaldiaren bukaeran, Onkologikoan kutxatilan sartutako mezua irakurri zuen Xabier Mitxelena medikuak. Erraustegiaren aurka arrazoi asko daudela esanez hasi zuen mezua: «gu, medikuak garen heinean, bat azpimarratu nahi dugu: erraustegiak kaltegarriak dira osasunerako». Nazioarteko foro zientifikoetan argitaratutako hainbat eta hainbat ikerketa aztertu di-tuztela azaldu zuen Mitxelenak, eta ateratako ondorioa jakinarazi zien bertaratutakoei: «erraustegi baten inguruan bizi diren herritarrek malformazio, aborto, minbibi eta heriotza tasa altuagoak dituzte. Behin eta berriz ematen da emaitza hau, erraustegi zaharrekin eta baita erraustegi modernoekin ere. Ikerketa publikoak dira eta jakin nahi duen edozeinentzat daude eskuragarri base zientifikoetan; baita politikoentzako ere».
Profesional arduratsu eta herritar kezkatu gisa, agintariei eskaera bat ere, egin zieten: «Lehenik, egia. Zintzotasunez joka dezatela eskatzen dugu. Onartu dezatela ikerketa hauek guztiak eginda daudela, eta emaitzak hauek direla. Bigarrengoz, hauen aurrean, ardura printzipioa aplika dezatela. Eta kasu honetan, aplikazio honek erraustegia ez egitea suposatzen du».