Orain bi aste abiatu zen Hernani Erabaki prozesua, herritarrek parte hartzeko 2017ko Udal Aurrekontuetan. Eta ordutik, «ekarpen asko» jaso ditu Udalak; guztira, 180 proposamen bildu dituzte.
«Horregatik, zorionak eman nahi dizkiegu herritarrei. Gure aurtengo asmoa da, prozesu herritarragoa lortu eta herritarrek ikustea egitasmo hau beraien behar eta gogoak asetzeko tresna gisa. Partehartze eta proposamen kopurua ikusita, lortzen ari gara», azpimarratu dute.
«Herritarrek ezagutzen dituzte beharrak hobekien»
Udalak uste du, herritarrak direla «egunerokoan Hernaniko beharrak hobekien ezagutzen dituztenak. Egunero ibili eta erabiltzen dituztelako kaleak, zerbitzuak, gogoak. Pixkanaka guztion artean eztabaida herritar hau sustatzen ari gara. Zeintzuk dira Hernanik dituen behar nagusiak? Zer hobetu daiteke nire ustez?».
Horregatik, herritarrak animatu nahi dituzte, «bide honetan jarraitzera» eta 2017ko aurrekontuetan sartzeko moduko proposamenak egitera: «Hernani hobe bat sortzea guztioi irekitako bidea dela ulertzen dugulako, proposamenak egiteko gonbitea luzatu nahi dizugu».
Azkeneko bilerak, aste honetan
Proposamenak egiteko, hiru aukera dauzkate herritarrek; batetik, auzo eta eraikin publikoetan dauden postontzietan; bestetik, erabaki.hernani.eus web orriaren bitartez; eta azkenik, auzoetako bilera irekietan. Aste honetan egingo dituzte azkenekoak: gaur, Portuko auzo elkartean 19:00etan; etzi, Gabriel Zelaian 18:00etan, ekonomia eta ingurumenari buruzko proposamenak egiteko; ostegunean, Karabeleko auzo elkartean, 20:00etan; eta azkena ostiralean, 18:00etan Biterin, kultura eta kirolari buruzkoak egiteko.
Ekainaren 5era arte izango dute aukera herritarrek, proposamenak egiteko, buzoietan zein web orrian.