Iritsi da Eternal Running lasterketa, Astigarragara. Bihar goizeko 11:00etan hasiko da, eta izena eman duten parte hartzaileek 10 kilometrotako lasterketa egin beharko dute, sorpresaz betetzea. Izan ere, ibilbidearen nondik-norakoak isilpean gorde dituzte antolatzaileek. Gainera, 80 oztopo, zein baino zein bereziagoak, gainditu beharko dituzte.
Lasterketak hiru ordu iraungo ditu, gehienez; 11:00etatik 14:00etara, eta tarte horretan aldaketak izango dira trafikoan, udaltzaingoak jakinarazi duenez.
Trafikoan aldaketak, 10:30etatik 14:00etara
Udaltzaingoak jakinarazi du hainbat aldaketa egingo direla trafikoan, bihar, lasterketa dela eta.
Batetik, Joankittene eta Arrobitxulo arteko bidea moztuko da lasterketa hasieran, 10:30etatik 11:10etara, eta Zubigain pasealekua ere itxiko da, 12:00ak arte; baita Oialume Bidea ere, Ergobiako errotondatik Eguskitza etxe pareraino. Bestetik, Arrobitxuloko bizilagunek Donostia ibilbidea erabili beharko dute sartu-irteerak egiteko, 12:00ak arte, eta 14:00ak arte, Ergobiako poligonoa. Aiotzategi, Ergobia eta Tranbia kaleko bizilagunek, berriz, Ergobiako errotonda erabili beharko dute sartu-irteeretarako, eta Kontxa Etxeberria kalekoek, Astigarraga aldeko bidea. Bestalde, Tranbia Bidea moztuko da erditik, korrikalariak helmugara iristen hasten direnean.
Oilaskoa eta sagardoa
Eternal Running lasterketetan, normalean, paella jateko aukera izaten dute parte-hartzaileek eta herritarrek, baina Astigarragan, bestelako aukera izango da.
Bihar eguerdiko 12:00etan hasi, eta 15:00ak bitartean, pintxo eta edari postuak jarriko dira Foru Plazan, baserriko oilasko eta sagardoarekin.