Ikasturteko azkeneko kontzertua eskainiko dute gaur, Hernani musika eskolako txistulariek. Eguerdiko 12:30etan izango da, udaletxekoa arkupeetan, eta bat egingo dute gaurko saioan, musika eskolako txistulari beteranoenek eta gaztetxoek.
Bereziki aukeratu dute pieza sorta, gainera: «herria festa giroan murgiltzen ari dela eta, errepertorio alaia prestatu dugu, txistu bandarako doinuz osatutakoa. Dantza eta jolaserako doinuak izango dira nagusi», azaldu dute.
Hamabi pieza, gustu eta dantza guztietarako
Guztira, hamabi piezako egitaraua prestatu dute, gustu eta dantza guztietarako: Sagardorik onena, A mi tierra vasca, Minuetoa, Hondarribia, Baranbio, Jokatxoak, bi herri dantza (Brokel dantza eta Baztango sagar dantza), hiru herri kanta (Ume eder bat, Gure kuadrilan eta Txantxibirin), eta Mendizaleak pieza jotzen bukatuko dute kontzertua.