Gaueko 21:15etan irekiko dituzte Tilosetako ateak, Plazara sartzeko, eta gala berezi bat aurkituko dute bertan, herritarrek. Gazte Olinpiaden Laburmetrai txapelketaren ekitaldi berezia egingo dute gaur, eta herritar guztiak gonbidatu dituzte, bertaratzera.
Ateak ireki eta 22:00etara bitartean, musika eta pintxoak egongo dira, gala girotzeko, eta orduan hasiko dira emanaldiak: gaueko 22:00etan argiak itzali, eta ekitaldiari hasiera emango diote, Ekipo A telesaileko musikarekin.
Hala ere, ordu laurden lehenago eskatuko diete bertaratuei, lekua hartzen joan daitezen.
Hamaika film labur, ikusgai
Olinpiadetako probetako bat izan da laburmetrai txapelketa, eta taldeek, binaka egin behar izan dute labur bana. Horrela, hamaika labur egin dituzte guztira, eta guztiak jarriko dituzte ikusgai gaur.
Honakoak dira laburren gaiak: Sidreros go home; Barrendero baten goizeko istorioak; Munizipalak sagardotegi garaian; Equipo de investigación: Zer dago Tilosetako kiosko azpian?; Parranda eta geroko makinak greban; Hernanin Lege Lehorra; Psikologo bat gimnasioan; Olinpiadetan dopin kasua; Rafak tranpak jarri ditu jardinean; Jeke batek Hernaniko kiroletan inbertitu du; eta Zerbait izugarria aurkitu da Santa Barbarako lakuan.