Olinpik Movies, Olinpiadetako Laburmetraien Gala egingo dute ostegun honetan, Plazan. Bertan jarriko dituzte, laburren txapelketako lan guztiak, 21:15etan hasita, eta ondoren, sariak banatuko dituzte. Guztira, bi ordu eta erdi inguruko saioa izango da.
Ez da nolanahiko gala izango, gainera. Alfonbra gorri eta guzti errekonozituko dituzte labur onenak, eta emanaldirako, pantaila haundiak jarriko dituzte.
Herritar guztiei, gonbitea
Gazte Olinpiaden barruko proba izan da laburmetraien txapelketa, baina etziko galara, parte hartu duten gazteak bakarrik ez, herritar guztiak gonbidatu dituzte.
Ostegunean, eguraldia lagun izatea espero dute, eta bestela, ostiralera atzeratuko lukete. Orduan ere txarra egingo balu, berriz, Atsegindegira mugituko dute gala, ostiralean bertan. Printzipioz, ostegunean daukate zita.