Kultur arteko astean sartuko da Hernani gaur, Hernani hitzetan lelopean, eta Goiz Eguzkin egingo dute aurreneko geldialdia, herrialde askotako poema, ipuin eta kantuekin.
Kontalari, dantzari eta musikariak, elkarrekin
Arratsaldeko 18:30etan jarri dute zita, egoitzaren kanpoaldeko parkean. Herritar guztiei zuzendutako saioa izango da, eta hamar lagunek hartuko dute parte: Idoia Sanchez, Maryam Idira eta Itziar Rekalde izango dira ipuin kontalariak; Zara eta Firuza Zaynieva kontalari eta dantzariak; Celia Okon eta Joana Ortega Barrenetxea musikariak; eta Kaylee Vasquez, Ulziibayr Tsetsegen eta Bouchra El Baghdadi ariko dira aurkezle lanetan.
Leokan eta gaztetxean, bihar
Bihar jarraituko dute kontaketek, eta zita bikoitza izango da: Leokako labaderoan aurrena, arratsaldeko 19:30etan; eta gaztetxean ondoren, gaueko 22:00etatik aurrera.
Leokan, ipuinak, poemak eta musika elkartuko dituzte, eta emakumeen eta poesiaren arteko lotura landuko dute, ahozko irakurketen bitartez.
Gaztetxean, berriz, Ilargia hitzetan saioa egingo dute, mikrofono irekiko gaueko emanaldia, hain zuzen ere.
Igandera arte izango dira ekintza gehiago, Biterin, gaztetxean eta Ereñotzun.