kiroldegiko berritze lanak direla eta, ekainaren 23an itxiko dituzte igerileku itxiak, eta horien erabiltzaileek «alternatiba bat izan dezaten, Hernaniko Udalak eta Donostia Kirolak hitzarmena adostu» dutela jakinarazi du Udala prentsa-ohar bitartez.
Donostiako Udalarekin sinatutako akordioaren arabera, «Hernaniko kiroldegiko bazkideek, Donostiako Paco Yoldi (Anoeta auzoa) eta Etxadi (Aiete) kiroldegietako igerilekuak erabili ahal izango dituzte».
Donostiako bi kiroldegi hauek aukeratzerakoan «gertutasuna eta mugikortasun jasangarria» kontuan hartu dituela azaldu du Udalak. Izan ere, «Donostia Hernanitik gertu dago eta garraio publikoan iristeko erraztasunak daude».
Lehen hartu-emanak, urte hasieran
Udalak oharrean azaldu duenez, akordioa lortzea ez da lan erraza izan: «Donostiako Udalarekin lehen hartu-emanak urte hasieran hasi zituen Hernaniko Udalak, eta akordioaren konplexutasuna dela eta, negoziazio prozesua luzea izan da. Kontuan hartu behar da Hernaniko Kiroldegiak 7.632 bazkide dituela eta horietatik erdiak, gutxi gorabehera, igerilekua erabiltzen duela».
Dena den, «Hernaniko Udalaren zein Donostiako Udalaren ahaleginari esker, hitzarmena gauzatu ahal izan da».
«Hitzarmena ekainean sartuko da indarrean»
Ekainaren 23an itxiko dute kiroldegiko igerilekua, eta urtebetez izango da itxita. Horregatik, «hitzarmena ekainean sartuko da indarrean, Hernaniko kiroldegiaren igerilekuak ixten direnean».
Horrez gain, Udalak gogorarazi du: «egun batzuk lehenago, ekainaren 19an, kanpoko igerilekuak irekiko dira eta irailaren 11ra arte hernaniarrek gozatu ahal izango dituztela».