Gaur sartuko da Hernani, denboraldiko txapelketa ezagunenetakoan; Herriarteko Txapelketan, alegia.
Adunaren kontra jokatu beharko ditu hiru partidu, iluntzeko 20:00etan hasita, Adunako frontoian bertan.
Adunako frontoia, arriskutsua
Kadeteetan, Garikoitz Arizmendi eta Oihan Zugastik jokatuko dute, Adunako Zabal eta Mujikaren kontra. Hernaniarrak faboritoak izango lirateke ohiko frontoi batean, baina Adunan, zaila izango da herriko aurrelariari pelota kentzea, eta partidu orekatua espero da.
Jubeniletan, Xabat Pagola eta Ioritz Berasarte aterako dira kantxara, Adunako Arruti eta Irazuren kontra. Hernaniarrak trinketean aritu dira orain arte, eta ederki entrenatzen ari dira, baina Adunako bikotea da faboritoa.
Azkenik, seniorretan, Paul Ojuel eta Eneko Aizpitarte hernaniarrak izango dira faborito, Iraola eta Otaegiren kontra, Euskal Herriko egungo txapeldunak baitira.
Zaleei, deia
Iazko emaitza txarrak atzean utzita, CD Hernanik azaldu du ez duela helburu garbirik jarri aurten. «Poliki-poliki joan nahi dugu, ahalik eta urrutien iristeko». Horretarako, deia egin die zaleei, «txapelketan zehar pelotariak animatzeko».
Berria Txapelketa, bihar
Bestalde, bihar 11:00etan Hernanin jokatuko dute Oberenak eta Zugarraldek, Berria Txapelketaren barruan.