Denboraldi hasieran larri ibili zen CD Hernaniko Emakumezkoen Euskal Ligako taldea, baina, azkenean, jardunaldi bat soberan ere izan dute, maila mantentzea lortzeko.
Gaurkoan, Realaren kontrako partiduan gozatzera aterako direla diote Andrea Isasa jokalariak, eta Ane Ibarburu, koordinatzaile berriak.
Emakumezkoen futbolak hazkundea izan duela nabaritu duzue?
Hernanin, batez ere, Jon Zabaleta entrenatzailea sartu zenean nabaritu zen. Orain Añorgan dabil. Estruktura aldetik dezente haunditu zen. Hasieran, kadete eta helduen mailak bakarrik zeuden, eta gaur egun, infantiletako bi talde, kadeteetako bat, lurraldeko bat eta Euskal Ligakoa dauzkagu. Hazkundea nabaritu da jokalari kopuruan, eta mutilen futbola bezala ezagutzen denera gerturatzen ari da neskena ere, maila eta estruktura aldetik.
Esan liteke CD Hernani klubak ere saiakera egin duela, berdintasunaren alde?
Aurreko zuzendaritzak ez zuen beste munduko saiakera berezirik egin, baina gizartean izan duen bultzadarekin, dinamikan sartu ziren. Eta gaur egun, berdintasunaren alde sendoago ari da. Adibidez, mutilek ez dute kuota ordaintzen, eta guk ere hori eskatu genuen. Azkenean, zuzendaritzarekin hitz eginda, eta bestelako faktore batzuei -patrozinatzaileei- esker, lortu dugu.
Berdintasunaren aldeko borroka horretan, zaleek ere badute erantzukizunik?
Aldatzen ari da hori ere. Garai batean, mutilen futbola bakarrik ezagutzen zen. Neskena hasi zenean, kopuruagatik, maila txikiagoa zuen, eta agian, ez zen oso erakargarria. Baina orain bada. Herri mailan ez da hainbeste nabaritzen, baina pasa den asteburuan, adibidez, derbia izan da Reala eta Atlheticen artean, eta sekulako giroa izan da. Gainera, neskek babesa ematen diogu elkarri. Gure arteko animoa inportantea da.
Zuek zergatik hasi zineten futbolean?
A.Is.: Urnietarra naiz, eta han hasi nintzen. Talde gutxi daude. Gure taldea izan zen lehenengoa, eta gaur egun mantendu egin da. Eskola Kirolean eskubaloia edo futbola izan genituen aukeran, eta futbola aukeratu genuen. Horiek segitzen dute. Ni Hernanira etorri nintzen, eta gustatu egin zitzaidan giroa.
A.Ib.: Ni ere Eskola Kirolean hasi nintzen. Beti izan dut gustoko kirola, eta etxean ere hala zen. Eskolan animatu, eta kadeteetan hasi nintzen. Gero zuzenean helduen taldera pasa nintzen. Orain, zorionez, hori aldatu da; adinaren araberako taldeak badaude.
«Gaur egun, berdintasunaren alde sendoago ari da CD Hernani»
Datorren denboraldian aldaketak izango dituzue: entrenatzailea, koordinatzailea, jokalariak...
Jokalari gehienek jarraitzeko asmoa daukate, baina ikasketengatik, edo denbora asko daramatelako, helduenek utzi egiten dute, eta taldea gazte geratzen ari da. Euskal Ligan lehen beterano gehiago zegoen, baina orain, kosta egiten da; zaharrenek 23 urte dauzkate. Entrenatzaile berria, berriz, Gorka Alvarez izango da. Nesken futbolean esperientzia haundia dauka. Eta koordinatzaile, ni (A.Ib.) sartu naute! Plantilla osatzeko, datuen zain gaude oraindik. Asmoa daukagu infantilen bi taldeak mantentzeko, ohorezko kadeteena... Gero, lurralde mailakoa, jubeniletako taldea izatera pasatzea erabaki da, egokiagoa iruditzen zaigulako.
Taldeko helburua finkatu duzue? Aurten maila mantentzea kosta egin da...
Aurreneko buelta gogorra izan da. Bi partidu bakarrik irabazi genituen, eta etorkizuna oso ilun ikusten zen. Talde gaztea gara, eta nabari da esperientzia falta. Baina maila aldetik oso kalitate onekoa da. Bigarren bueltan, berriz, guztiz aldatu zen kontua, eta jardunaldi bat soberan izan genuen salbatzeko! Hurrengo urtean ere, helburu hori izango dugu.
Gaur, Realaren kontra, zer espero duzue?
Maila aldetik, partidu polita izango da, eta kiroltasuna izango da nagusi, lehiarik gabe. Denboraldia bukatzeko, partidu polita!