80 urte beteko dira ekainaren 3an Joxe Manuel Lujanbio ‘Txirrita’ hil zela. Txirritaren bertsoak eta urteurrena aitzaki hartu, eta urtean zehar hainbat ekitaldi antolatu dituzte Ereñotzu auzoan eta Urumea bailaran. Aurreneko ekitaldia asteazkenean izan zen: Koldo Izagirre idazlearen hitzaldia.
Mendi buelta, Txirritaren bizitzan esanguratsuak izan ziren lekuetatik
Ekitaldiek, bihar izango dute segida. Mendi irteera antolatu dute; Ereñotzuko Plazatik abiatuko dira, Txirritak lehenengo bertso saioa egin zuen etxe aurretik. Ibilbidean zehar, Txirritaren bizitzan eta bertsoetan esanguratsuak izan diren lekuetatik pasako dira: Latxe (jaiotetxea) Uxuka-Erreka-Altxuin (haurra galdu zeneko harria) Epele-Fagollaga (hildako artzaya) eta Ereñotzu. Puntu bakoitzean, Txirritaren bertsoak kantatuko dituzte, leku konkretu horiei aipamena egiten zaien bertsoak. Goizeko 09:30etan abiatuko dira plazatik eta ibilbidea 3-4 ordukoa izango da.
Gipuzkoan izan diren aldaketak, bertsoak aztertuz
Txirritaren omenezko ekitaldiek asteazkenean jarraituko dute. Luzia Alberro historiako irakasleak hitzaldia emango du berak egindako tesi doktoraletik abiatuta: Bertsolarien ahoz moderniazaio prozesua eta identitate bideak Gipuzkoa. 1830-1936. Gipuzkoan izan diren aldaketak aipatuko ditu, 6 bertsolariren bertsoak aztertuta. Auzo etxean, 19:00etan.