San Isidro egunean bakarrik ez, «garrantzitsuagoa da baserritarrak urte osoan zehar gogoan izatea», adierazi du Astigarragako EH Bilduk, prentsa ohar baten bidez. Eta salatu du, Udal Gobernua «utzikeria galanta» ari dela erakusten, «gai honetan ere».
Horregatik, berriro eskatu dio Baserritarren Mahaia osatzeko: «pleno eta batzordeetan behin eta berriz eskatu arren, Udalak ez du urratsik eman». Aurreko legealdian sortu zuten mahaia, Goldeak eskatuta, elkarteko ordezkariekin, hainbat baserritarrekin, adituekin, udal teknikariekin eta ordezkari politikoekin. Astigarragako baserri eta baserritarren diagnosi sozioekonomikoa burutu zuten orduan.
«Beharrezkoa da baserrien diagnosiari zukua ateratzea»
«Txostenari esker, ezagunak eta ezezagunak zitzaizkigun egoerak azalarazi ziren, eta aurrera begira egiteko hainbat ekintza aurreikusi. Beraz, beharrezkoa da diagnosi horri zukua ateratzea, apal batean ahaztuta ez geratzeko. Hauxe bera errepikatu diogu Udal Gobernuari behin baino gehiagotan, eta egingo duenaren agindua eman arren, ez du urrats bat bera ere eman», kritikatu du EH Bilduk.
Horren adibide jarri ditu Udal Aurrekontuak: «EAJren aurrekontuetan, 1.000 euro besterik ez ziren jaso, ekintzak martxan jartzeko. EH Bilduri esker, 12.000 euro gehitzea lortu da».
Herri bideak eta seinalizazioa hobetzeko, eskaera
Beste eskaera, «herri bideak konpontzeko 150.000 bideratzea izan zen, baina EAJk eta PSE-EEk ez zuten onartu». Asmo horri eutsi nahi dio EH Bilduk: «Udalak 1.000.000 euro baino gehiagoko aurrezkia zuela jakinda, eskatu dugu 150.000 euro horretara bideratzea; eta urtebeteko inbertsio hori nahikoa ez denez, lau urtetan zehar errepikatzea kopuru minimo hori, 2020 bukaerarako gutxienez 600.000 inbertitzeko herri bideetan eta seinalizazioan».