Ereñotzuko mendi lasterketaren 6garren edizioa izango da jokoan ekainaren 5ean. Ia edizio guztietan parte hartutakoa zara zu. Zer du berezia Ereñotzuko mendi lasterketak?
Ni jaio, hazi eta bizi naizen auzoko mendi lasterketa dela kontuan izanda, berezia da bertan korrika egitea. Niretzat kuttunak diren parajeetan barrena egiten da, eta inguruko jendearen animoak lagun izaten dituzu.
Beraz, Ereñotzun izatea motibazio berezia da
Noski. Aipatu bezala oso berezia da etxean korrika egitea. Auzoko jendeak antolatzen du; auzoko jende askoaren lanari esker sortu den mendi lasterketa da.
Ibilbidean izan dira aldaketak azken urteetan. Hasieran Ondditik barrena zen lasterketa; azken hiruetan berriz Urdaburu da tontorrik altuena. Zein nahiago duzu?
Biak dira politak, baina bietan bat aukeratu beharko banu, Urdaburun barrena dijoana aukeratuko nuke. Bidetxur gehiago ditu pista gehiago; eta dituen bistak ere, politagoak iruditzen zaizkit.
Ibilbidearen deskripzio bat egin beharko bazenu, zein da zatirik gustukoena?
Zatirik gustukoena politenaren ikuspuntutik hartuta, Arrondo menditik hasi eta Igoringo lepora dagoen zatia aukeratuko nuke. Gainez gain, bista ederrak ditu; ezkerrera begiratuta: itsasoa, epelerreka... eskuinera begiratuz gero: Usoko erreka, bailara, Onddi, Agina, Urdaburu...
Eta zatirik gogorrena?
Zatirik gogorrena hasierakoa iruditzen zait. Ereñotzutik Arrondoko puntara bitartean, aldapa dexentekoa da, komeni da ondo berotuta ateratzea eta hasiera hori lasai hartzea. Bestela, gerta daiteke, bide guztian zehar gorputzari buelta ezin emanik ibiltzea.
Eta non gozatzen duzu gehien?
Urdaburu puntatik Ereñotzura bidean gozatzen dut gehien. Ordurako zatirik gogorrenak eta jaitsiera teknikoagoak pasata izaten baitira.
Parte hartzen duzun lasterketa guztietan izango duzu helburu denbora hobetzea. Aurtengoan zer duzu helburu?
Batez ere ondo gozatzera aterako niaz; eta ahal bada, iazko denbora hobetu nahiko nuke.
Aurreneko ereñotzuarra izan al daiteke erronka horietako bat?
Ez, ez! Nahiz eta polita izango litzatekeen hori, auzoan maila haundiko korrikalariak daude.
Ereñotzuar eta hernaniar ugari mugitzen dituen mendi lasterketa da Ereñotzukoa. Gertukoa izatea al da arrakastaren arrazoi nagusia?
Gertukoa da, oso herrikoia. Nire ustez aipatzekoa da, halako auzo txikia izanik, dagoen antolakuntza maila. Modu batera edo bestera, auzotar askok egiten duten lan egun honen bueltan.
Ereñotzukoaz gain, urtean zehar parte hartzen al duzu beste mendi lasterketaren batean? Zein duzu gustukoen?
2012an Urnietako Mendi Lasterketan hartu nuen parte. Aurten ere bertan izango naiz, eta Goizuetakoan ere hartuko dut parte. Gustukoena zalantzarik gabe Ereñotzukoa da. Eta hau prestatzen hasita, parte hartu izan dut bailarako edo gertuko beste lasterketa batzuetan ere. Baina etxekoa beti da berezia.
Azken aldian puri-purian daude mendi lasterketak. Noiz eta nola hasi zinen zu?
Nire lehenengo mendi lasterketa Ereñotzuko lehenengo mendi lasterketa izan zen, 2011n. Lasterketa hau zela eta hasi nintzen korrika egitean pentsatzen, betan parte hartzeak ilusio berezia egiten baitzidan. Lehenik ere mendian asko ibilia nintzen arren, korrika orduan hasi nintzen.
Nahi duenak badu aukera oraindik, Ereñotzuko mendi lasterketan izena emateko. Nola animatuko zenuke jendea?
Esango nieke oso lasterketa herrikoia dela eta pixka bat korrika ibiltzen den edonork egin dezakeela. Oso paraje politak igarotzen dira, bista ederrekin, eta giro ezin hobea egoten da bai lasterketan zehar, eta baita auzoan ere. Bukaeran, salda beroa, pintxoak eta opari mordoa izaten dira partaideentzat; eta nahi duenak auzo elkartekoekin bazkaltzeko aukera ere badu!