Joan den maiatzaren 2an Itziar Moreno presoari isolamendu zigorra jarri zioten Fresneseko espetxean. Zigor honen aurrean, eta beste bi kide zigor ziegan sartu ostean, Fresneseko gizonen moduloko bost presok gose greba mugagabeari ekin zioten maiatzaren 10ean; tartean, Ugaitz Errazkin hernaniarrak.
Bederetzi egun daramazkite gose greban, eta «kartzelan dauden kideei bakarrik ez daudela erakusteko», Elkartasun Gunea sortu dute Tilosetan, atzotik.
Hiru helburu «argi»
Prentsaurrekoan azaldu dutenez, Elkartasun Gunea osatu dute «beraiekin batera borrokatzeko. Kartzelan dauden gure kideei ez daudela bakarrik erakutsiko diegu, eta salbuespen egoera ororekin amaitu behar dela».
Horretarako, hiru helburu «argi» zehaztu dituzte: «elkartasuna, konpromisoa eta herritarron konpromisoa». Eta dei egiten diete herritarrei parte hartzera, izan ere, «salbuespen egoera ororekin amaitu behar dugu, guztion ardura da».
Egunez eguneko egitaraua
Herritar taldeak azaldu duenez, «uneoro jendea izango da, zigorra bukatu arte», eta egitarau berezia prestatuko da egunero.
GAURKO EGITARAUA
11:00 Elkarretaratzea.
12:00 Kalejira-kazerolada (egunero).
16:00 Hurrengo eguneko ekintzen egitarau irekia prestatzea (egunero).
17:00 Herriari informazioa ematea.
18:00 Egitarau irekiko ekintzak antolatzea.
20:00 Herri elkarretaratzea Fresneseko presoei elkartasuna adierazteko (egunero).
22:00 Mahai-ingurua, presoen egungo egoerari buruzkoa.
Ondoren, gau akanpada pasa.