Udaberrian gaude bete-betean, lore eta landareen sasoia; eta hori aprobetxatuz, lore eta landareen azoka egingo dute larunbat goizean, Urbieta kalean.
Atzo aurkeztu zuten azoka honen hirugarren edizioa Hernaniko Parke botanikoan, eta bertan egon ziren ekimenaren antolatzaileen ordezkariak: Koro Etxeberria eta Gurutze Amigorena, Udaletik; Ainhoa Amundarain, Behemenditik; eta Juantxo Pollarcino eta Miren Lizeaga, Dekoloretik.
Denetarik, 12 postutan
Denera 12 postu izango ditu aurtengo azokak, eta denetarik jarriko dute eskuragarri: garaiko landare eta loreak, kosmetika naturala, artisautza, sukaldatzeko haziak...
Baina ez hori bakarrik; izan ere, haurrek ere izango dute ondo pasatzeko aukera, eta horretarako, egurrez egindako jolasak ere jarriko dituzte eskuragarri.
Saltzeko beste modu bat
Azokaren bitartez, helburua da «lore eta landareak eta ekoizle profesionalak jendeari gerturatzea», Behemendiko Ainhoa Amundarainek azaldu zuenez.
Dekoloreko Juantxo Pollarcinok eskertu nahi izan zien Hernaniko Udalari eta Behemendiri, «azken kontsumitzailearekin elkartzeko tokiak mantentzeko» aukera hau eman izatea.