Erraustegiak umeengan izango duen eraginengatik kezkatuta dagoen GuraSOS taldeak antolatuta, Erraustegiak osasunean izan ditzakeen ondorioak jardunaldia egingo da larunbatean Galarretako Orona Ideo gunean.
Arratsaldeko 16:30etatik aurrera bertan elkartuko dira guraso, familia, osasun- eta hezkuntza-komunitateak, erraustegiek osasunean sor ditzaketen eraginei buruzko informazioa bildu eta eztabaidatzeko asmoz.
Hitzaldiak, helduentzat
Fernando Palacios Ikerketa Zientifikoen Goi Zentroko (CSIC) zientzialariak hasiko du jardunaldia, 16:30ak pasata. Berak emango die bertaratzen direnei, erraustegiaren eraginei buruz argitaratu den informazioaren berri. Jarraian, Erraustegia eta Osasuna taldeko txostena aurkeztuko du taldeko kide batek.
18:00ak aldera atsedenaldia egingo da, eta ondoren, bertaratzen direnek 3 mahai-ingururen artean hautatu ahal izango dute: ikerketa eta osasun arloko profesionalen foroa, hezkuntzako profesionalen foroa eta gizarte foroa.
Jolasak, txikienentzat
Jardunaldiak iraun bitartean, umeak gune ludikoan egon ahal izango dira.