Abian Prozesua hasi zuen Ezker Abertzaleak 2015garren urteko bukaeraz geroztik. Hilabeteak eman zituzten etorkizunari buruzko eztabaidak egiten, eta apirilaren 16an egin zuten azkeneko batzarra, prozesuari bukaera emanez.
Hiru kontsentsu
Prentsa-ohar bitartez jakinarazi duenez, azkeneko batzar horretan Ezker Abertzaleak «etorkizunerako erabakiak» hartu ditu. Eta horiek «hiru kontsentsu nagusitan laburbiltzen dira. Aurrenekoa: Ezker Abertzalearen proiektu politikoak erabateko gaurkotasuna du eta horien alde aritzea da gure nortasunaren ikurra. Bigarrena: Euskal Herrian independentzia gauzatzeko aroari ateak irekitzera goaz. Eta azkena: Ezker Abertzaleko kideok askapen mugimenduaren kapital humano eta politikoa bilduko duen erreferentziazko tresna politikoa behar dugu. Sorturen eraberritzearen bidez, Euskal Herriari egiten diogun eskaintza independentista eta gure kultura politikoa gaurkotu eta abiarazteko apustua eginez».
«Zeregin garrantzitsua»
Hiru erabaki hauek «zeregin garrantzitsua» utzi dietela diote Ezker Abertzaletik: «Ezker Abertzale osoaren eraberritzea eta Sorturen birfundazioa», hain zuzen. Prozesu berriaren helburua behar duten «tresna eta kultura politiko berrituaren eraikuntza kolektiboari ekitea da».
Bilera irekia, bihar
Horretarako oinarria «Ezker Abertzaleko eta herri sektoreetako erabaki eta hausnarketetan kokatzen» dutela diote. Ondorioz, bilera sorta berria jarriko dute abian hemendik aurrera. Aurrenekoa bihar egingo dute, 19:30etan, Biterin.