Prentsa ohar bidez, Luis Intxauspe alkateari mezua helarazi nahi izan dio Orain Hernanik, adierazteko ez daudela ados «Hernani Erabaki 2014ko parte-hartze prozesuko 6garren proposamenerako bideratutako partidaren kudeaketa txarrarekin».
«20.000 euro horiek bestela erabili dira, Hernani Erabaki prozesuan erabakitakoa indargabetuz»
Orain Hernanik azaldutakoaren arabera, 2014ko Hernani Erabaki, aurrekontu parte-hartzaileetako prozesuan erabaki zen «20.000 euroko partida bideratzea Indarkeria jasaten duten emakumeentzat arreta psikologiko eta juridikorako zerbitzua sortzeko». Baina salatu du zerbitzu hori ez dela sortu, eta «20.000 euro horiek bestela» erabili direla dio, «Hernani Erabaki prozesuan erabakitakoa indargabetuz».
Hain zuzen, Orain Hernanik azaldutakoaren arabera, horrela erabili da partida hori: «1.860,12 euro, emakumeenganako biolentziari erantzuteko protokoloaren ebaluazioaren diseinurako, 2012an egin zena; 841,02 euro, 2015eko otsailetik abendura bitartean izandako emakumeenganako biolentzia kasuetan erantzuteko bigarren protokoloa egiteko; 4.242,10 euro, protokolo horren ebaluazioa egiteko; eta 10.460 euro, Plax! Sexu eta bikote aholkularitza zerbitzurako».
«Berdintasun arloak 283.797 euroko urteko aurrekontua dauka gauza horietarako»
«Herritarrek bozkatutako proposamena gauzatzeko eskatzen dugu»
Hala ere, Orain Hernanik argi utzi nahi izan du «zerbitzu horiek beharrezkoak» direla, baina, era berean, azaldu du: «Berdintasun arloak 283.797 euroko urteko aurrekontua dauka gauza horietarako».
Hori horrela, «herritarrek bozkatutako proposamena gauzatzeko eskatu» nahi izan dute.