Beste urte batez, 4x4 kotxeak protagonista izango dira gaur, Bidebitarte poligonoan. Euskal Herri osoko 25 bat kotxe iritsiko dira gaur Astigarragara; Zangozatik, Arbizutik, Goizuetatik, Gasteizetik... etorriko dira, besteak beste.
Astigarragak ere izango du ordezkaritza: Iñaki Artola, Iñigo Betelu eta Iñaki Larrarte izango dira bertan, hain zuzen.
Bost orduko proba
Arratsaldeko 15:30etan hasiko da ikuskizuna, eta 20:30ak arte luzatuko da. Bost orduz ariko dira 4x4 kotxeak lokatz artean, antolatzaileek bereziki prestatutako oztopoen artean. Izan ere, eskabadorarekin zulo haundiak egin dituzte, eta batzuk urez bete. Aurtengoan ez da penalizaziorik egingo, eta beraz, denbora gutxien egiten duena izango da irabazlea.
Erakustaldia ikusi ahal izateko, 2 euro ordaindu beharko dira han bertan. Gainera, sarrera erosten dutenen artean, urdaiazpikoa eta bi sagardo botila zozketatuko dituzte. Eremua lokaztuta egongo denez, botak janztea gomendatu diete antolatzaileek, joaten direnei.
Erakusketa, goizean
Horrez gain, goizeko 10:00etatik 15:00ak arte, kotxeen erakusketa izango da, Bidebitarte poligonoko Txingurri tabernan.