Urteko aurreneko jaiak dira Etxeberriko Mendekosteak Hernanin; eta horregatik dira hain jai bereziak. Mendekoste jaiek iragartzen dute festak hemen direla, San Joanetarako geroz eta gutxiago geratzen dela, uda badatorrela...
Gaur hasiko dira jaiak, arratsaldeko 18:00etan Etxeberri danborradaren omenez botako den txupinazoarekin, pelotalekuan. Segidan, buruhaundiak aterako dira, eta helduen danborradak borobilduko du hasiera, gaueko 23:00etan.
Asteburuan ere, festa!
Bihar eta etzi ere, festa giroan murgilduta izango dira Etxeberrin. Bihar bertan, 10:30etatik aurrera egingo dira marrazki lehiaketa, jolasak, patata tortilla lehiaketa, paella jatea...