Hernaniko bost emakume kirolari protagonista dituen dokumental laburra aurkeztuko du bihar Udalak, 18:00etan Sandiusterrin, eta ondoren, mahai-ingurua izango da.
Atzo eman zuten dokumentalaren berri Garazi Etxarri, Berdintasun zinegotziak eta Esti Aldeiturriaga, Jarduera Fisikoa eta Kirol zinegotziak. «Helburua da ikusaraztea emakumeek zein traba izaten dituzten kirola egiteko. Orain arte, espazio pribatuan egin du kirola emakumeak, eta orain ari da esparru publikoa hartzen, baina oraindik ez dago berdintasunik», azaldu zuen Aldeiturriagak. Etxarrik gehitu zuen «herrian daukagun altxorraren lagin bat» dela dokumentala; «oztopoen gainetik ehunka emakumek egiten dute jarduera fisikoa Hernanin».
Bost protagonista
Bideoan bost emakume ageri dira: Ainhoa Azurmendi, Aventoko kirol aholkularia; Kristina Iriberri palista; Eva Esnaola ultrafondoko atleta; Miren Lopez arraunlaria eta Jenny Perlaza, Jarduera Fisikoa eta Kirolean lizentziatua. Mahai-inguruan, berriz, izango dira Azurmendi; Kontxi Ormazabal korrikalaria; Garbiñe Tijero, CD Hernaniko pala saileko arduraduna; eta Patri Espinar, EMAKeko kidea.