Astelehenean bildu ziren Astigarragako udal ordezkariak eta A3 Orain! taldeko kideak Foru Aldundiarekin. Udalak prentsa-ohar bitartez adierazi du, bertan «Diputazioko Mugikortasun sailak A1 eta A2 Hernanira iristen diren ordutegiak egokitu nahi ditu, G2 eta G3 zerbitzuekin autobus-aldaketa (edo transbordoa) azkarragoa izan dadin».
Udalaren eskaerari, ezezkoa
Udalak ez du bileraren baloraziorik egin, baina dioenez, «Foru Aldundiak Astigarraga eta Ospitaleak-Antiguo lotura hobetzea aztertuko» duela hitzeman du.
Dena den, Udalak jakinarazi du «A3 linearen aldeko sinadurak kontuan izanda, udal gobernuak Diputazioari eskatu zion, A3a bidaiari kopuru haundienak erabiltzen zuen ordutegian behintzat zerbitzua eskaintzeko». Hori ikusita, Aldundiak T2aren luzapena jarri zuen proba modura, baina erabiltzailerik ez duenez, kendu egingo duela jakinarazi zion Udalari.
A3 Orain! taldea, ezkor
Aldundiaren erantzunaren aurrean, A3 Orain! taldeak esan du «bilera ezkorra» izan zela, izan ere, «ez dute A3aren inguruan sartu nahi, transbordoaren inguruan ez bada».
Kronikara bidalitako prentsa-oharrean diotenez, Iñaki Prego Mugikortasun saileko ordezkariak, «prepotentzia haundia erakutsi du, guk 250.000 euro jarriz gero, A3a jarriko zukeela adierazteraino».
Informazio gehiago, biharko batzar irekian
Bilera honi buruz hitz egiteko eta hurrengo pausuak erabakitzeko, batzar irekia deitu du A3 Orain! taldeak biharko. Arratsaldeko 19:00etan izango da, Herri Eskolako areto berrian (sarrera musika eskolaren paretik). Herritarrak bertaratzeko dei berezia egin du taldeak.