Nazioarteko kontzertua izango da gaur Astigarragako Txomiñenea frontoian, goizeko 11:00etan hasita. Europako lau haizeetako doinu eta dantzak ekarriko dituzte, lau herrialde ezberdinetako musikari eta dantzariek.
Izan ere, Donostia 2016ren barruan, Emusik jaialdia ari dira ospatzen egun hauetan, Europako Musikari Gazteen Jaialdia. 28 herrialdetako musika eta dantza eskolak hartu dute parte, eta 20.000 ikasle inguruk. 77 herritan izan dira kontzertuak, eta horietako bat, Astigarragan izango da, gaur.
Bulgaria, Eslovakia, Luxenburgo eta Talavera de la Reinatik etorriak
Zehazki, lau musika eta dantza eskolatatik etorriak dira, kontzertua eskainiko dutenak: Bulgariako Buditeli taldea, abesbatzak eta folk dantza taldeak osatua; Eslovakiako Ostrvka folk musika taldea; Luxenburgoko Perkussion Ensemble of the AEM; eta Talavera de la Reinako soka talde haundia eta dantzariak.
Kontzertua antolatu dute, Donostia 2016 eta EMU Musika Eskolen Europako Elkartearekin batera, Norberto Almandoz musika eskolak eta Astigarragako Udalak.