Galdeketaren balorazioa egin du EH Bilduk, agerraldi baten bitartez, eta azaldu du, nahiz eta emaitzak ez izan «nahi genituenak», jasotako «babes zabalak» indarrak ematen dizkiela «birziklapenaren alde eta erraustegiaren kontra lanean jarraitzeko». Izan ere, nabarmendu du beste herrietan baino babes haundiagoa lortu duela atez atekoak Astigarragan.
Gainera, uste du izandako partehartzeak erakusten duela «herritarren %60a birziklatzearen alde dagoela, eta hori ez litzake posible izango atez atekoa jarri ez balitz. Beraz, hiru urte hauen balorazio positiboa egiten dugu: besteak beste, hondakinak bereizten ikasi eta ohitura bereganatu dugu, kontzientziazioa areagotu da, eta galdeketaren bidea berrireki du, demokrazia partehartzailea sustatzeko tresna bezela bultzatzen jarraituko duguna», aurreratu dute.
«Sistema berria eraginkorra izan dadin, jarraipena egingo diogu»
EH Bilduk argi utzi nahi izan du, ez duela «inolako eragozpenik» jarriko sistema aldaketarako: «are gehiago, jarraipena egingo diogu, eraginkorra izan dadin, gure helburua %80ko bilketa mailari eustea baita». Eta horretarako, uste du egokiena dela «bilketa Garbitaniaren edo Udalaren esku geratzea», azaldu dute.
Bukatzeko, EAJri eskatu dio «EH Bildu arrazoirik gabe erasotzeari utzi, eta sistema aldaketa abian jartzeko lanean hasteko». Eta bi galdera zuzen luzatu dizkio: «astigartarrok apirilaren 17an erabakitakoa errespetatuko duzue? Eta Zubietarrek erraustegiari emandako ezezko borobila? EH Bilduk erantzun garbia dauka bientzat: Bai eta Bai. EAJk?».